ብድሌትካ ናብ ሃገርካ ምምላስ
Frivillig återvandring – tigrinska
ልክዕ ከምቲ ኣብ ሽወደን ዑቕባ ንምሕታት መሰል ዘሎካ፥ ናብ ናትካ ሃገር ክትምለስ ወይ ውን ናብ ካልእ ንኽትነብረላ መሰል ዘሎካ ሃገር ናይ ምግዓዝ መሰል እውን ኣሎካ እዩ። ኣብዚ ጽሑፍ’ዚ፡ ብዛዕባ’ቲ ናብ ሃገርካ ክትምለስ ከሎኻ ብ”ሚግራሾንስቨርከት” ኪግበረልካ ዚኽእል ናይ ገንዘብ ደገፍ፥ ብዝያዳ ከተንብብ ትኽእል ኢኻ።
ገንዘባዊ ደገፍ ንምርካብ ምልክታ ክተቕርብ ትኽእል ኢኻ
ካብ ሃገር ሽወደን ክትግዕዝ ወሲንካ እንተ ደኣ ዄንካ፥ ካብ ”ሚግራሾንስቨርከት” ናይ ምምላስ ሓገዝ ገንዘብ (återvandringsbidrag) ንምርካብ ምልክታ ክተቕርብ ትኽእል ኢኻ።
መን ነቲ ሓገዝ ኪቕበል ይኽእል?
ኣብ ሽወደን ብጊዜ ዝተደረተ መንበሪ-ፍቕድ ምስ ዚህልወካ ወይ ቀዋሚ መንበሪ ፍቓድ ምስ ዚህልወካ፤ ነቲ ሓገዝ ገንዘብ’ቲ ንምርካብ ምልክታ ክተቕርብ ትኽእል ኢኻ። እንተደኣ ከም፡-
- ስደተኛ ዝተቖጸርካ
- ብመቝነን ስደተኛ ዝመጻእካ
- ከም ኣማራጺ ዑቕባ ዘድልዮ ሰብ ዝተቖጸርካ ዄንካ
- ብፍሉይ ተነቃፊ ናይ ህይወት ኩነታት ምኽንያት ፍቓድ ዝተዋህበካ ዄንካ
- ወይ ብስድራ ቤታዊ ምትእኽኻብ ምኽንያት፥ ምስ ሓደ ካብዞም ኣብ ላዕሊ ዝተጠቕሱ ዓይነት ፍቓዳት ዘሎዎ ሰብ ንምቕማጥ ዝመጻእካ/ኪ ምስ ትኸውን እዩ።
ብዛዕባ ኣባላት ስድራቤት
ንናይ ገዛእ ርእስኻ ሓገዝ ገንዘብ ንምርካብ ምልክታ ክተቕርብ ከሎኻ፥ ኣብቲ ጊዜ’ቲ ውን ንስድራ ቤትካ (ንሰበይትኻ/ንሰብኣይኪ፡ ከምኡ ውን ንትሕቲ 18 ዓመት ዝዕድሚኦም ደቅኻ) ውን ክትሕተሎም ትኽእል ኢኻ። ፍሉይ ምኽንያት ምስ ዚህሉ፥ ነቶም ካልኦት ምሳኻ ዚቕመጡ ኣዝማድካ ውን ሓገዝ ገንዘብ ክትሓተሎም ትኽእል ኢኻ። ንኣብነት፡ ንመጻምድቲ ናብራኻን ነቶም 18 ዓመት ዝመልኡ ደቅኻን ውን ኪኸውን ይኽእል እዩ።
መን እዚ ሓገዝ ገንዘብ’ዚ ኪኽልከል ይኽእል?
ሓገዝ ገንዘብ ኣይወሃበካን’ዩ እንተ ደኣ፡-
- ሽወደናዊ ዜጋ ዄንካ
- ብመሰረት መምርሒ ጃምላዊ ምቕባል ስደተኛታት፥ መንበሪ ፍቓድ ዝረኸብካ ወይ ካብ ኡክራይና ዝመጻእካ ስደተኛ ዄንካ እዩ
- እኹል ናይ ርእስኻ ገንዘብ ምስ ዚህልወካ፥ እሞ ንመገሻኻ ዚግበር ወጻኢታት ባዕልኻ ክትሽፍን ትኽእል እንተ ዄንካ።
እቲ ዚወሃብ ሓገዝ ገንዘብ ክንደይ ዚኣክል እዩ?
እቲ ሓገዝ ገንዘብ፡ 10 000 ክሮኖር ንነፍሲ ወከፍ በጽሒ ሰብ፥ 5 000 ክሮኖር ድማ፡ ንነፍሲ ወከፍ 18 ዓመት ዘይመልአ ቆልዓ እዩ። ሓደ ስድራ ቤት፡ እንተ በዝሐ 40 000 ክሮኖር ይቕበል።
እቲ ሓገዝ ገንዘብ ዚፍቀደልካ እንተ ዀይኑ፥ ”ሚግራሾንስቨርከት” ነቲ ናይ መገሻኻ ወጻኢታት ውን ይኸፍለልካ እዩ። ናብ ሃገርካ በጺሕካ ንኽትምለስ ወይ ውን ኣቝሑ ገዛ ናብ ሃገርካ ንምስዳድ ግን፡ ሓገዝ ገንዘብ ኣይወሃበካን እዩ።
ምልክታ ኣብ ተቕርበሉ ጊዜ እንታይ ክትሓስብ የድልየካ?
- መገሻኻ ክትፍጽሞ መታን ክትክእል፡ ናይ መገሻ ሰነዳት ኪህልወካ ይግባእ።
- ናብ ሃገርካ ዘይኮነስ ናብ ካልእ ሃገር ክትግዕዝ ትደሊ እንተ ዄንካ፥ ኣብታ ሃገር’ቲኣ ንምቕማጥ ፍቓድ ዝረኸብካ ክትከውን ይግባእ።
- ዘድሊ እንተደኣ ዀይኑ፡ ናይተን ኣብ ጊዜ መገሻኻ ትሓልፈን ሃገራት ቪዛታት ኪህልወካ ይግባእ።
- እቲ ምልክታኻ ናባና ምስ ቀረበ፥ ነቲ ዝነበረካ ናይ ዑቕባነት ደረጃ ንኽንስሕቦ መጽናዕቲ ንጅምር።
- ካብ ሽወደን ምስ ገዓዝካ፡ ሚግራሾንስቨርከት ነቲ ቀዋሚ መንበሪ ፍቓድካ ኪስሕቦ እዩ። ንኽትዕቅቦ ትደሊ ምስ ትኸውን፡ ናባና ክተመልክት ትኽእል ኢኻ። ብዛዕብኡ ብዝበለጸ ኣብቲ፡- ምስ መቐመጢ ፍቓድካ ካብ ሽወደን ምጋሽ - Resa från Sverige med uppehållstillstånd ዚብል ኣቲኻ ብዝበለጸ ኣንብብ።
- ኣብ ቤት ስልጣን መንግስታዊ መኽፈልቲ ዕዳ (Kronofogdemyndigheten) ዘይተኸፍለ ዕዳ ምስ ዚህልወካ፥ እቲ ዋና መምርሒ ከም ዚብሎ፥ ናይ ምምላስ ሓገዝ ገንዘብ ክትወሃብ ከም ዘይትኽእል እዩ።
ካብ ሃገር ናይ ምውጻእ ሓገዝ ገንዘብ - ብኸምዚ ዚስዕብ ተመልክት
ካብ ሃገር ናይ ምውጻእ ሓገዝ ገንዘብ ንምሕታት ክትመልኦ ዘሎካ፡ ሓደ ኦርኒክ ኣሎ። ንሱ ድማ ”ካብ ሃገር ሽወደን ወጺእካ ኣብ ካልእ ሃገር ንምንባር ሓገዝ ገንዘብ ንምሕታት ዚቐርብ ምልክታ” (Ansökan om bidrag för resa från Sverige för bosättning i annat land) ዚብል’ዩ። ዝተማልአ ናይ ምልክታ ኦርኒክ ክተቕርብ ኣዝዩ ኣገዳሲ እዩ።
እቲ ተቕርቦ ምልክታ ናብዚ ዚስዕብ ኣድራሻ ልኣኮ፡-
Migrationsverket
Box 3100
903 03 Umeå
ነዞሞ ዚስዕቡ ነገራት ውን ኣተሓሒዝካ ክትልእኸልና የድሊ’ዩ፡-
- ናይቲ ኣብ ፓስፖርትኻ ዝወድቀሉ ጊዜን ግላዊ ሓበሬታን ዘሎዎ ቅዳሕ ናይ ፓስፖርትኻ ገለ ገጻት እዩ። ስድራ ቤትካ ምሳኻ ስዒቦምኻ ዚኸዱ ምስ ዚኾኑ፤ ናቶም ናይ ፓስፖርት ቅዳሕ ውን ክትልእኽ የድሊ’ዩ። ፓስፖርት ዘይብልኩም ምስ ትኾኑ፤ ቅዳሕ ናይ ካልእ መንነትካ ዘረጋግጹ ሰነዳት ክትልእኩ ትኽእሉ ኢኹም።
- ቅዳሕ ናትካን ናይቶም ልዕሊ 18 ዓመት ዝኾኑ ኣባላት ስድራ ቤትካን፥ ናይቲ ኣብ መወዳእታ ጊዜ ብዛዕባ ደምዳሚ ሓበሬታ ክፍሊት-ግብሪ (slutskattebeskedet) ዘረጋግጽ ካብ ”ስካተቨርከት” ዝተላእከልኩም ሰነድ።
- ብጽሑፍ ናይ ምስምማዕካ መረጋገጺ ወረቐት። ናይ ቆልዑ ሓባራዊ ሓላፍነት ምዕባይ ቆልዑ ምስ ዚህልወኩም፤ እቶም ቆልዑ ውን ምስ ሓደ ካብቶም ወለዲ ካብዚ ሃገር ዚግዕዙ ምስ ዚኾኑ፥ ናይቲ ኣብ ሃገር ሽወደን ዝጸንሕ ወላዲ/ት፥ ናይ ምስምማዑ መግለጺ ኪህብ ይግባእ እዩ።
- ካብታ ትኸዳ ዘሎኻ ዓዲ ናይ ዝረኸብካዮ ናይ ምንባር መሰል፥ ቅዳሕ ናይቲ ውሳኔ ወይ ተመሳሳሊ ናይ መንበሪ ፍቓድ ተቕርብ። እዚ ድማ ናብ ሃገርካ ዘይኮነስ፡ ናብ ካልእ ሃገር ትኸይድ ምስ ትኸውን እዩ።
ኣከፋፍላ ናይቲ ሓገዝ ገንዘብ
እቲ ዚኽፈል ናይ ሓገዝ ገንዘብ፡ ኣብቲ ትወጸሉ ጊዜ ኣብ ሓደ ናይ ሽወደን ባንክ ሕሳብካ ከም ዚኽፈለካ ኪግበር እዩ።
ምልክታ ምስ ኣቕረብካ እዚ ዚስዕብ ከጋጥም እዩ
ናይ ምምላስ ሓገዝ ገንዘብ ንምርካብ ምልክታኻ ምስ ኣቕረብካ፥ ነቲ ጉዳይካ ኣጽኒዕና ኣብቲ ንምምላስ እትገበሮ መገሻ ክንሕግዘካ ኢና።
- ነቲ ዝቐረበ ምልክታኻ ክንጸንዖ ኢና፤ ኣድላዪ ምስ ዚኸውን ተወሳኺ ሓበሬታ ክትህበና ክንሓተካ ኢና።
- ንሕና እዞም ኣብ ሚግራሾንስቨርከት ዘሎና ውሳነ ምስ ኣሕለፍና፥ ናብቲ ኣብ ህዝባዊ መዝገብ ተመዝጊብካሉ ዘሎኻ ኣድራሻ፡ መልእኽቲ ክንሰደልካ ኢና።
- ኣብቲ ውሳነ’ቲ፡ ናይ ምምላስ ሓገዝ ገንዘብ ክትቅበል ትኽእል ኢኻ ዚብል ትሕዝቶ ምስ ዚህልዎ፥ ሽዑ ንስኻ፡- ክትግዕዝ ከም ዝኾንካ ናብ ስካተቨርከት ምልክታ ክተቕርብ ኢኻ (anmäla till Skatteverket att du ska flytta)
External link, opens in new window. - ቅዳሕ ናይቲ ንምግዓዝ ዝገብርካዮ ምልክታ ድማ፥ ናብ ሚግራሾንስቨርከት ክትእከልና ኢኻ።
- ሚግራሾንስቨርከት ቲከት ኪእዝዘልካ እዩ፥ ነቲ ቲከት ድማ ናባኻ ኪልእከልካ እዩ። እቲ ገንዘብ ድማ ናብ ናትካ ናይ ሽወደን ናይ ባንክ ሕሳብ ከም ዚኣቱ ኪግብር እዩ።
ኣብቲ ናይ ምልክታኻ ኦርኒክ፥ መዓስ መዓልቲ ክትገይሽ ከም ትደሊን - ናበይ ቦታ ከም ትገይሽን ክትሕብር ኢኻ። ሽዑ ድማ ምግራሾንስቨርከት፥ ብዝተኻእለ መጠን፡ ከምቲ ድሌትካ መሰረት ናይ መገሻ ቆጸራ ኪሕዘልካ እዩ። ነቲ ጉዳይካ ክነጽንዕ ከሎና፥ ብዛዕባ’ቲ ዕለት ምሳኻ ብምዝርራብ ክነረጋግጾ ኢና።
እቲ ዚምላእ ኦርኒክ
ሕጊታትን ድንጋጌታትን
ንዓኻ ካብ ሃገር ሽወደን ክትግዕዝ መዲብካ ዘሎኻ፥ ካልኦት ተወሰኽቲ ናይ ኢንተርነት መራኸብቲ ቀለቤታት
ብዛዕባ ካብ ሽወደን ምውጻእ - ልሙዳት ዝዀኑ ሕቶታትን መልስታትን
ኣይፋል፡ እቲ ዚኽፈለካ ሓገዝ ገንዘብ፡ ኣብቲ ካብ ሃገር ሽወደን ትወጽኣሉ ጊዜ እዩ ዚኽፈለካ። ገለ ካብቶም ኣባላት ስድራ ቤት ክጸንሑ እንተ ዀይኖም፥ ኣብቲ ንሱ/ንሳ ካብ ሃገር ሽወደን ዚወጽኡሉ ጊዜ፥ ሽዑ ድማ እቲ ሓገዝ ገንዘብ ይወሃቦም።
ኣብ ካልእ ሃገር ንኽትቅመጥ መደብ እንተ ጌርካ፥ ሚግራሾንስቨርከት ነቲ መንበሪ ፍቓድካ ኪስሕቦ ይኽእል እዩ። እንተዀነ ግን፡ ነቲ ቀዋሚ-መንበሪ ፍቓድካ ንኽትዕቅቦ ምልክታ ምስ ተቕርብ፥ ካብ ሽወደን ወጺእካ እንተነውሐ ንኽልተ ዓመት ዚኣክል እቲ መንበሪ ፍቓድካ ከይተሳሕበ ኪጸንሕ ይኽእል እዩ።
ኣብዚ ዚስዕብ ብዝበለጸ ኣንብብ፡- ምስ ፍቓድካ ካብ ሃገር ሽወደን ምጋሽ - Resa från Sverige med uppehållstillstånd
ንስኻ እንተ ደኣ ከም ሓደ ስደተኛ ወይ ከም ሓደ ኣማራጺ ዑቕባ ዘድልዮ ሰብ ተፈላጥነት ረኺብካ፥ ”መግለጺ ደረጃ ዑቕባነት” (skyddsstatusförklaring) ተዋሂቡካ እንተ ኔሩ፥ ኣብቲ ካብ ሽወደን ግዒዝካ ናብ ሃገርካ ንምምላስ ገንዘባዊ ሓገዝ ዘመልከትካሉ ጊዜ፥ ንሱ ውን ኪሰሓብ እዩ። ሓደ ሰብ፡ ብገዛእ ምርጭኡ ናብ ሃገሩ ተመሊሱ ምንባር ዝደሊ ምስ ዚኸውን፥ ከም ልሙድ ኣረዳድኣ፡ ናይ ዑቕባ ኣድላይነት ከም ዘሎዎ ሰብ ኣይቁጸርን እዩ።
ነቲ ምልክታኻ ምስ ተቐበልናዮ፥ እሞ ንስኻ ከም ስደተኛ ተፈላጥነት ረኺብካ ”መግለጺ ደረጃ ዑቕባነት” ዘሎካ ሰብ ምስ ትኸውን፥ ሽዑ ነቲ “መግለጺ ደረጃ ዑቕባነት” ናትካ ንምስሓብ ናይ ጉዳይካ መጽናዕቲ ክንምጅምር ኢና። ሽዑ ድማ፡ ነቲ ናትካ “መግለጺ ደረጃ ዑቕባነት” (statusförklaring) እንተ ሰሓብናዮ፥ እንታይ ተቓውሞ ከም ዘሎካ ርእይቶኻ ንኽትህብ ብደብዳበ ክንሓተካ ኢና። ነዚ ዝተላእከልክ ደብዳበ መልሲ ምስ ዘይትህበሉ፥ ንስኻ ከምኡ ንኽንገብር ተቓዉሞ ከም ዘይብልካ ጌርና ክንትርጉሞ ኢና። ነቲ ናይ ምምላስ ሓገዝ ገንዘብ ምስ ተቐበልካ ድማ፡ ነቲ ናትካ “መግለጺ ደረጃ ዑቕባነት” (statusförklaring) ክንስሕቦ ኢና።
ከም ብሓድሽ ናይ መንበሪ ፍቓድ ንምርካብ ምልክታ ክተቕርብ ትኽእል ኢኻ። ናብቲ ኣብ ቀረባኻ ዚርከብ ቆንስል ሽወደን ወይ ኤምባሲ ሽወደን ምልክታ ክተእቱ ትኽእል ኢኻ። እቲ ናይ መንበሪ ፍቓድ ጉዳይካ ምስ ተፈጸመ ኢኻ፥ ናብ ሃገር ሽወደን ክትመጽእ ትኽእል። ኣቐዲምካ ካብ ሃገር ሽወደን ንምግዓዝ ሓገዝ ገንዘብ ካብ “ሚግራሾንሰቨርከት” ተቐቢልካ ምንባርካ፥ ኣብቲ ንጉዳይካ ንርእየሉ ጊዜ ትርጉም ኣይክህልዎን እዩ።