گەڕانەوەی خۆویست
Återvända självmant – sorani
گەڕانەوەی خۆویست واته تۆ بۆ گەڕانەوە هاوکاری دەکەیت. کاتێ کە تۆ وەڵامی ڕەدت بە داخوازیی پەنابەرییەکەت وەرگرتووە دەشێت پلان دابنێیت بۆ بەجێهێشتنی سوید.
کاتێ کە تۆ بڕیاری ڕەد یان دەرکردنت وەرگرتبێت بۆ وتووێژێک لەگەڵ کاربەدەستێک لە دەزگای کۆچدا بانگ دەکرێیت. ئەو کاتە سەبارەت بەو بژاردانەی لە دۆخەکەی تۆدا هەن زانیاریت پێ دەدرێت و پاشان تۆش دەتوانیت پرسیار بکەیت.
ئەگەر تۆ خۆت نەتوانیت سەفەرەکەت بخەیتە ڕێ تۆ و کاربەدەستەکە پێکەوە پلانێک دادەنێن لەبارەی چۆنێتیی جێبەجێبوونی سەفەرەکە. تۆ هەروەها دەتوانێت مافی پاڵپشتیی نەختی یان پاڵپشتیی ترت هەبێت بۆ ئەوەی ئاسانتر بتوانیت لە وڵاتدا خۆت جێگیر بکەیتەوە.
سەبارەت بەوەی کە چ کەسێک لە کاتی گەڕانەوەدا دەتوانێت پاڵپشتی وەربگرێت لێرە زۆرتر بخوێنەوە:
ئامادەکردنی پەساپۆرت یان بەڵگەنامەی کاتیی سەفەر (پەساپۆرتی کاتی)
بەرپرسێتیی ئامادەکردنی پەساپۆرت یان بەڵگەنامەیەکی کاتیی سەفەر و شتی تر کە پێویستن بۆ ئەوەی بتوانیت بگەڕێیتەوە بۆ وڵاتەکەت یان بۆ وڵاتێکی تر کە لەوێدا مافی ژیانت هەیە بە ئەستۆی تۆیە.
ئەگەر سەبارەت بە بەڵگەنامەی سەفەر پێویستت بە هاوکاری هەبێت ئەوە دەزگای کۆچ دەتوانێت بۆ داواکردنی بەڵگەنامەیەکی کاتیی سەفەر بۆت پێوەندی بکات بە دامودەزگاکانی وڵاتەکەتەوە. ئەو کاتە دەزگای کۆچ دەبێت زانیارییەکەسییەکانت ڕادەستی دامودەزگای وڵاتەکەت بکات، بەڵام ئێمە ناگێڕینەوە کە تۆ لە سویددا داوای پەنابەریت کردووە.
ئەگەر نەکرێت بەڵگەنامەیەکی کاتیی سەفەر ڕێک بخرێت دەتوانیت وەک دۆخی ئاوارتە لەلایەن دەزگای کۆچەوە پەساپۆرتێکی کاتیی بیانییان وەربگریت. ئینجا ئەو پەساپۆرتە کاتییەی بیانییانە تەنیا بۆ ئەوە بەبایەخە کە تۆ بتوانیت سەفەر بکەیتەوە بۆ وڵاتەکەت.
بلیت بۆ سەفەرەکە
سەفەر دەبێت بۆ ئەو وڵاتە بگریت کە لە بڕیاری ڕەدکردن یان دەرکردنەکەتدا هەیە.
لە پلەی یەکەمدا ئەوە خۆتی کە دەبێت پارەی گەڕانەوەت بۆ وڵاتەکەت بدەیت. ئەگەر تۆ هیچ پارەیەکی خۆت یاخود داهاتی ترت نەبێت، ئەوا دەزگای دەوڵەتی کۆچ و کۆچبەران ئەتوانێت بلیتت بۆ بگرێت و پارەکەشی بدات. ئ ئەگەر تۆ خۆت پارەی سەفەرەکە دەدەیت، بیر لەوە بکەرەوە کە تۆ دەبێت هەمیشە بەڵگەنامەی بایەخداری سەفەرت هەبێت کاتێ کە سەفەرەکەت دەگریت.
ئەگەر تۆ سەفەرێک بکڕیت کە ترانزیتی وڵاتێکی هەبێت کە تۆ تیایدا مۆڵەتی مانەوەت نەبێت، مەترسیی ئەوەی هەیە تاوانانە (غەرامە/جەریمە)ت لێ بستێنن یان دامودەزگاکانی وڵاتەکە داوات لێ بکەن کە بگەڕێیتەوە بۆ سوید. هەر لەبەر ئەوە سەفەرێک بگرە بەبێ ئەوەی ترانزیتی لە وڵاتێکی تری شەنگنەوە هەبێت. دەزگای کۆچ بۆ ئەو سەفەرانەی کە خۆت گرتووتن، هیچ بەرپرسێتییەک ناگرێتە ئەستۆ. ئەگەر تۆ سەفەرێک هەڵدەبژێریت کە ترانزیتی لە وڵاتێکی تری شەنگندا هەبێت دەبێت خۆت لەڕێی بەدەستهێنانی ڤیزا بۆ وڵاتەکە، وا بکەیت کە مافی مانەوەت لەوێدا هەبێت.
خانوو، کارتی بانکی و کارتی ئێل‌ئێم‌ئا
پێش لەوەی سوید بەجێ بهێڵیت دەبێت کارتی ئێل‌ئێم‌ئاکەت ڕادەستی دەزگای کۆچ بکەیتەوە. ئەگەر کارتێکی بانکیت لەلایەن دەزگای کۆچەوە وەرگرتبێت دەبێت پارەکان لە هەژمارەکە دەربهێنیت و کارتەکە بدەیتەوە دواوە. ئەگەر لە یەکێ لە خانووەکانی دەزگای کۆچ ژیاوی دەبێت خانووەکە بەجێ بهێڵیت و کلیلەکان بدەیتەوە دواوە.
ناوەندیی گەڕانەوە
پاشی ئەوەی کە بڕیاری ڕەتکردنەوە و وەدەرنان لە وڵات دەستیکرد بەکارکردن (چووە قۆناغی جێبەجێکردنەوە). تۆ جێگایەکت لە نێوەندیی گەڕاوەکان پێشکەش ئەکرێت. تۆ لە نێوەندیی گەڕاوەکان ئەژیت تاوەکو سوید بەجێئەهێڵیت یاخود تا ئەو کاتەی کە تۆ چیتر مافی یارمەتیی ئابووریی و شوێنی نیشتەجێبوونت نامێنێت. لەهەمان کاتیشدا بەواتای ئەوە دێت کە دەزگای دەوڵەتی کۆچ و کۆچبەران ئیتر چیتر شوێنی نیشتەجێبوونت پێشکەش ناکات. ئامۆژگاریی و پاڵپشتی وەرئەگریت بۆ ئامادەباشی بۆ گەڕانەوەکەت.
تۆ ئەتوانیت هەڵبژێریت کە لە نێوەندیی گەڕاوەکان یاخود لە ماڵی خۆتدا بژیت تا ئەو کاتەی سوێد بەجێئەهێڵیت.
چاودێریی نەخۆشی و قوتابخانە
هەتاکوو ئەو ڕۆژەی وڵات بەجێ دهێڵیت هەر وەکوو پێشوو مافی چاودێریی نەخۆشیت هەیە، بەڵام پاش ئەوەی بڕیارەکەت گەیشتە دۆخی جێبەجێبوون و مافت بۆ پاڵپشتیی ئابووری هەڵوەشایەوە، هیچ قەرەبوویەکی ئابووریت بۆ دەرمان و چاودێری پێ نادرێت.
منداڵان مافی ئەوەیان هەیە هەتاکوو لە سوید ماونەتەوە بچنە قوتابخانە.
سەبارەت بە منداڵان لە ڕەوتی پەنابەریدا زۆرتر بخوێنەوە:
سەفەری دەرەوە
هەمیشە بەرپرسیارێتی خۆتە کە بە دەزگای کۆچی سوید Migrationsverket نیشان بدەیت کە تۆ بە گوێرەی بڕیاری خۆت سویدت بەجێهێشتووە. ئەگەر دەزگای کۆچی سوید نەیزانیوە کە تۆ سەفەرت کردووە، دەتوانین بڕیار بدەین سەبارەت بە قەدەغەکردنی گەڕانەوەت بۆ ناو ناوچەی شینگن. هەروەها لەوانەیە کەیسەکەت بنێردرێتە پۆلیس.
ئەگەر بڕیاری ڕەتکردنەوە یان بڕیاری دەرکردن کەلە دوای 6ی ئازاری 2023 بۆت دراوە، ئەوا پێویست ناکات فەرمانگەی کۆچی سوید ئاگادار بکەیتەوە، چونکە بڕیارەکەت لە سیستەمی زانیاری شینگن(SIS)
تۆمار دەکرێت. ئەگەر تۆ پابەند بیت بە بڕیارەکە و لە ماوەی مۆڵەتی خۆتدا سوید جێبهێڵیت، ئەوا تۆمارکردن هەڵدەگیرێت و دەزگای کۆچی سوید بە شێوەیەکی ئۆتۆماتیکی ئاگاداری ئەوە وەردەگرێت کە تۆ ناوچەی شینگنت بەجێ هێشتووە.
ئەگەر بڕیاری رەتکردنەوەی چوونە نێو سوید یان دەرکردنت پێش 6ی ئازاری 2023 بۆ درابێت، ئەوا دەزگای کۆچی سوید پێویستی بە زانیاری دەبێت کە تۆ وڵاتەکەت جێهێشتووە. ئەگەر لە دەزگای کۆچی سوید بڕوانامەی سەفەری دەرەوەت وەرگرتبێت، دەبێت لە کاتی دەرچووندا بیدەیت بە چاودێری پاسپۆرتی سویدی (بڕوانامەی سەفەری دەرەوە تەنها لە فڕۆکەخانەکانی سوید دەدرێت). هەروەها دەتوانیت بە ناردنی کۆپییەکی پاسپۆرت کە لە لاپەڕەی یەکەمی پاسپۆرتەکەدا زانیارییە کەسییەکانی تێدایە و ئەو پەڕەیەی کە مۆری دەرچوونی لەسەرە (بە ژمارەی دیاریکردن) بۆ دەزگای کۆچی سوید بیسەلمێنیت. تەنها بلیتی فڕین یان کارتی سواربوون بەکارناهێنرێت بۆ جەخت کردن لە سەر دەرچوون.
تکایە تێبینی ئەوە بکە کە نابێت سەفەر بکڕیت کە لە وڵاتێکی تری شینگن ترانزیت بکەی ئەگەر مۆڵەتت نەبێت لەوێ بمێنیتەوە. ئەگەر پرسیارێکت هەیە سەبارەت بە سەفەری دەرەوەت، دەتوانیت پەیوەندی بە نزیکترین یەکەی پێشوازیکردن بکەیت.
زانیاریی پێوەندیی بە دەزگای کۆچ بدۆزەرەوە: (بە ئینگلیزیى)
ڕۆیشتن بۆ وڵاتێکی تر جگە لە وڵاتەکەی خۆت
وڵاتێکی تر لەناو یەکێتیی ئەورووپاوە
دەزگای کۆچ دەتوانێت بڕیار دەر بکات کە تۆ بچیت بۆ وڵاتێکی تری یەکێتیی ئەورووپا و داوای پەنابەرییەکەت لەوێ لێکۆڵینەوەی لەسەر بکرێت. بۆ نموونە دەتوانێت لەبەر ئەوە بێت کە تۆ پێش لەوەی بێیت بۆ سوید لە وڵاتێکی تری یەکێتیی ئەورووپادا بووبیت، یان تۆ ڤیزات بۆ وڵاتێکی تری ئەورووپی هەیە یان داوای پەنابەریت لەوێ کردووە. ئەم ڕێسایانە لە یاسای دوبلیندا هەن.
ئەگەر لە باتیی ئەوە دەتەوێت بگەڕێیتەوە بۆ وڵاتەکەت دەتوانێت بلوێت بە مەرجێ کە گەڕانەوەکەت ماوەی زۆرتر نەخایەنێت یان گرانتر نەبێت.
سەبارەت بە یاسای دوبلین زۆرتر بخوێنەوە: (بە ئینگلیزیى)
وڵاتێکی تر جگە لەو وڵاتەی لە بڕیارەکەدا دیاری کراوە
دەتوانیت بگەڕێیتەوە بۆ وڵاتێکی تر جگە لەو وڵاتەی لە بڕیارەکەدا دیاری کراوە ئەگەر بتوانیت پیشان بدەیت کە لەوێ وەردەگیرێیت. ئەو کاتە دەبێت پەساپۆرتێکی بەبایەخت هەبێت و مۆڵەتێک کە لەو وڵاتە مەبەستەدا بژیت. بۆ وێنە ئەگەر تۆ ڤیزایەکی تووریستیت هەبێت یان ئەو شوێنە ڤیزای پێویست نەبێت، بەس نییە. هەروەها نابێت گەڕانەوەت بۆ ئەوێ ماوەی زۆرتر بخایەنێت یان زۆر گرانتر ببێت.